Veer Viere Vastelaovend Digitaal! Det sjrieft sjtadsvastelaovesvereniging d’n uul mediapartner van ML5 op heur FB-pagina. D’n Uul geuft hie invulling aan door te sjarte op Youtube mit ein eige Uule-tv kanaal.
Op 22 jannewarie om 18.00 oer sjtart het Youtube kanaal Uule-tv, mit de eerste eige oetzending/produksie: De Digitale Primäör van ’t Zjwetskammezaol, liefblaad van Sjtadsvastelaovesvereniging Dn Uul.
Eder jaor waert ’t Zjwetskammezaol op de eerste dónderdaag nao de Nach van de Nuuje Sjtadsprins geprizzenteerd. In ’n kroeg in Remunj staon de luuj hutjemutje biej-ein en zeen getuge van de Aovend van de Primäör. Op ’t inj waert’t eerste eksemplaar oetgereik aan de Sjtadsprins van Remunj.
Dit jaor is ter geine Aovend van de Primäör, mer prizzenteert de Zjwetskammezaol-riddaksie van D’n Uul uch de Digitale Primäör. Mit o.a:
- Frits Criens en Sjtadsvastelaovesdichter Marc Latta
- interviews mit Jos Rulkens en Anneke Smeets die allebei ónger angere aktief zeen gewaes in de legendarische bóntje aovende van D’n Uul
- Ted van Etten euver de Prinselikke Stadts-Garde Faubourg St. Jacques
- kwisse mit Sabine Pereij: de Grote Uule-Corona-Kwis
- aan de tillefoon mit Lenie det same mit Soffie poets op ’t Sjtadhoes en dao vanalles heurt
- meziek van Henk Jan Bilman, Big Benny & Vleisboeket, Patrick Gerets, Resi Coumans en Patrick Roger
- kleine inkiekskes in anger artikele.
- ‘t grote interview mit de Sjeemprinse van Remunj die ’t eerste eksemplaar van ’t Zjwetskammezaol 2021 kriege oetgereik.
Väöl kiek- en loesterplezeer, ónger ’t jaormotto van D’n Uul: Vastelaovend, mit aafsjtandj ‘t sjoonste! En de rès kint geer laeze in ’t Zjwetskammezaol!